28.12.2009

Bandaríska alríkislögreglan (FBI) segir að engin hætta hafi verið á ferðum um borð í flugvél á leið frá Amsterdam til Detroit í Bandaríkjunum, aðeins tveimur dögum eftir að misheppnuðu hryðjuverkaárás var gerð um borð í flugvél á sömu leið.

Farþegi, Nígeríumaður, var handtekinn eftir „truflandi hegðun“ um borð í flugvélinni. Flugmaður Delta-þotunnar kallaði eftir neyðaraðstoð þegar hann lenti flugvélinni í Detroit í gær.

Farþegar vélarinnar, 255 talsins, voru fluttir frá borði heilir á húfi. Maðurinn, sem sagður er vera frá Nígeríu líkt og árásarmaðurinn 25. desember, er í haldi.

Hann mun hafa orðið lasinn og læsti sig í um klukkustund inni á salerni í þotunni. Við það sótti ótta að áhöfninni sem lýsti yfir neyðarástandi um borð. Maðurinn var handtekinn eftir lendingu en talsmaður FBI segir engin sprengiefni hafa fundist á honum og atvikið hafi ekki verið alvarlegt.

Þetta kom fram á fréttavef Morgunblaðsins í dag.

28.12.2009

Atli Steinn Guðmundsson skrifar:

Óeinkennisklæddum lögreglumönnum í farþegaflugi verður fjölgað í kjölfar atburðanna sem áttu sér stað í flugi milli Amsterdam og Detroit á jóladag.

Janet Napolitano hjá heimavarnastofnun Bandaríkjanna segir ekkert benda til þess að tilraun nígerísks verkfræðinema til að sprengja farþegaflugvél í loft upp í flugi frá Amsterdam til Detroit hafi verið hluti af alþjóðlegu hryðjuverkasamsæri. Þrátt fyrir það hefur óeinkennisklæddum og vopnuðum lögreglumönnum í bandarískum farþegaflugvélum verið fjölgað síðan atvikið átti sér stað en það hefur CNN-fréttastofan eftir öðrum og ónafngreindum heimildamanni hjá heimavarnastofnuninni.

Verkfræðingurinn verðandi hafði ekki annað upp úr krafsinu en að kveikja í buxunum sínum áður en skelfingu lostin áhöfn flugvélarinnar yfirbugaði hann með aðstoð annarra farþega en bandarísk flugmálayfirvöld líta málið engu að síður mjög alvarlegum augum eins og flugfarþegar um gervalla Evrópu fengu að reyna á eigin skinni þegar þeim var gert að mæta allt að fjórum klukkustundum fyrr en ella vegna herts öryggiseftirlits og sprengjuleitar og þykir mörgum borið í bakkafullan lækinn eftir allar þær tafir sem samgöngur í Evrópu hafa mátt sæta vegna fannfergis fyrir jólin...

28.12.2009

Framkvæmdastjórn japanska flugfélagsins Japan Airlines (JAL) íhugar nú alla þá möguleika sem félagið hefur og er einn þeirra að setja félagið í þrot. JAL fékk nýverið greiðslustöðvun en japanska ríkið þarf væntanlega að bjarga félaginu og ef af því verður þá er það í fjórða skiptið síðan árið 2001. Talsmaður JAL segir að allt verði reynt til þess að forða félaginu frá gjaldþroti.

Meðal aðgerða sem gripið verður til svo hægt verði að rétta rekstur JAL við, er að segja upp þúsundum starfsmanna og fækka áætlunarleiðum verulega.

JAL hefur fengið boð frá bæði American Airlines og Delta Air Lines um fjárhagslegan stuðning gegn því að þau fái minnihlutaeign í JAL. Þykir til mikils að vinna að komast að á Asíumarkaði þar sem JAL er með sterka stöðu.

Þetta kom fram á viðskiptavef Morgunblaðsins í dag.